Бирлашган Араб Амирликлари пойтахти Абу Дабида ўтказилган Халқаро овчилик ва от спорти кўргазмаси — ADIHEX 2026-нинг якуний аукционида янги жаҳон рекорди қайд этилди.

Унда камёб Gyr Pure Ultra White зотли оқ лочин 2.1 миллион дирҳамга, яъни қарийб 571 минг АҚШ долларига сотилди. Амирликларнинг давлат ахборот агентлиги WAM хабар беришича, бу аукционда лочин учун тўланган энг юқори нарх ҳисобланади.

Нодир «ультраоқ» патларга эга ушбу қуш АҚШдаги махсус фермада парваришланган. Зотдор кречетнинг насл-насаби ва жисмоний кўрсаткичлари юқори экани уни коллекционерлар эътиборига туширган. Шу сабабли у жорий йилги аукционнинг энг кўп қизиқиш уйғотган лотига айланди.

Аввалроқ худди шу кўргазма доирасида мазкур зотга мансуб яна икки лочин ҳам сотилган эди. Улар учун мос равишда 1.5 миллион ва 1.1 миллион дирҳам — тахминан 408 минг ва 300 минг доллар тўланган.

ADIHEX 2026 кўргазмаси шейх Ҳамдан бин Зоид Ол Наҳаён ҳомийлигида ўтказилди. Тадбирда дунёнинг 71 мамлакатидан 2.4 минг компания, жумладан, 55 та йирик лочинчилик фермаси вакиллари иштирок этди.