Ўзбекистон Марказий банки 2026 йил бошидан буён қарийб 40 тонна олтин сотиб олди. Шу кўрсаткич билан мамлакат Жаҳон олтин кенгаши маълумотларида йил бошидан буён энг кўп олтин харид қилган марказий банклар орасида учинчи ўриндан жой олди.

Январь–июль ойларида олтин захираларини энг кўп оширган давлатлар:

Польша — қарийб 90 тонна

Хитой — қарийб 60 тонна

Ўзбекистон — қарийб 40 тонна

Қозоғистон — қарийб 29 тонна

Шу билан бирга, Ўзбекистон Марказий банки июль ойида қарийб 1 тонна олтин сотган. Бу даврда Хитой 20 тонна ва Польша 8 тонна олтин харид қилган бўлса, Россия қарийб 6 тонна, Туркия, Иордания ва Ўзбекистон эса қарийб 1 тоннадан олтин сотган.

Ўзбекистоннинг олтин захираси қанча?

Жаҳон олтин кенгаши маълумотларига кўра, июль охирида Ўзбекистоннинг олтин захиралари қарийб 431 тоннани ташкил қилган.

Эътиборлиси, олтин мамлакат халқаро захираларининг тахминан 87 фоизини ташкил этмоқда.

Солиштириш учун: Польшада олтин захираси 640 тоннага, Хитойда 2366 тоннага етган, Қозоғистонда эса йил бошидан буёнги харидлар ҳисобидан сезиларли даражада ошган.

Марказий банк олтинни сотиши мумкин

Марказий банк раиси Тимур Ишметов олтин ҳозирча энг яхши инвестиция бўлиб чиққанини таъкидлаган.

Шу билан бирга, регулятор халқаро захираларни бошқариш доирасида олтинни «қулай нархларда» сотиш имкониятини ҳам кўриб чиқмоқда.

Марказий банк аввалроқ захиралардаги олтин ҳажмининг ўзгариши нафақат олтин сотиб олиш ёки сотиш операциялари, балки жаҳон бозоридаги нарх ўзгаришлари билан ҳам боғлиқ бўлиши мумкинлигини билдирган.

Дунёда марказий банклар қанча олтин олди?

2026 йил январь–июль ойларида дунё марказий банклари жами қарийб 130 тонна соф олтин харид қилган.Бу кўрсаткич 2025 йилнинг шу даврида қарийб 160 тоннани ташкил этган эди. Шунга қарамай, Жаҳон олтин кенгаши марказий банкларнинг олтинга бўлган қизиқиши ҳануз юқори эканини қайд этмоқда.