Anthropic компанияси тадқиқотчиси Жейкоб Коксон сунъий интеллект (СИ) соҳасини тарк этмоқда. 27 ёшли британиялик математик технологик корпорациялар ўртасидаги шиддатли рақобат инсониятни «қайтиш нуқтаси»га яқинлаштираётганидан хавотирда. Унинг фикрича, энг ёмон сценарий амалга ошса, 2027 йил охирига бориб вазият назоратдан чиқиши мумкин. Бу ҳақда The Wall Street Journal хабар берди.

«Биз энг оғир сценарийлар сари ҳаракатланяпмиз. Бундай ҳолатда 2027 йил охирига келиб вазият назоратдан чиқиб кетиши мумкин», — дейди Коксон.

Тадқиқотчи ўзини ўзи ривожлантира оладиган сунъий интеллект моделларини яратиш пойгасида иштирок этишдан бош тортмоқда. Унинг таъкидлашича, бундай тизимлар бир кун келиб инсон назоратидан чиқиб, инсониятга таҳдид солиши мумкин.

Коксоннинг айтишича, унинг ҳамкасблари сунъий интеллектнинг ҳозирги ривожланиш суръатини тобора кўпроқ «танқидий нуқта» ва «эндшпиль» каби иборалар билан ифодаламоқда.

Йил бошида Коксон СИ хавфсизлиги соҳасидаги тажрибаси сабабли OpenAI компаниясидан Anthropic-га ўтган эди. Бироқ энди у ташқи тартибга солиш механизмларисиз ёки соҳани ривожлантириш суръатини мувофиқлаштирилган тарзда секинлаштирмасдан туриб, ҳеч бир хусусий компания сунъий интеллектни ахлоқий жиҳатдан хавфсиз ишлаб чиқа олмаслиги ҳақидаги хулосага келди.

Шу билан бирга, Коксон Anthropic-нинг сунъий интеллект хавфсизлигига ёндашувини ҳамон ҳурмат қилишини билдирган.

Соҳани тарк этгач, тадқиқотчи шеъриятни ўрганишни режалаштирмоқда.