Айрим лидер тадбиркорларга Ижтимоий реестрга киритилган оилаларни кооперацияга жалб қилгани учун 5 млрд сўмгача гаров таъминотисиз кредит ажратилишига рухсат берилади.

Бу “Барқарор иш ўринларини яратиш ва кичик бизнесни жадал ривожлантириш орқали аҳоли даромадларини ошириш чора-тадбирлари тўғрисида”ги Президент фармонида белгиланди.

Фармонга кўра, кредит туман (шаҳар) штаби қарори асосида ажратилади. Бунда жалб қилинган ҳар бир оила учун 50 млн сўмдан ҳисобланади.

Шунингдек, оилавий тадбиркорликни ривожлантириш ва ёшлар тадбиркорлиги дастурларининг имтиёзли кредит ресурсларини бошқариш ваколати туман (шаҳар) штабларига ўтказилади.

2026 йил 1 октябрдан ўзини ўзи банд қилган шахслар ҳамда кичик ва ўрта тадбиркорлик субъектларига тижорат банклари кредитлари бўйича фоиз харажатларининг бир қисмини компенсация қилиш механизми жорий этилади.

Бунда компенсация бериш тўғрисидаги қарорни туман (шаҳар) штаблари қабул қилади. Қарор қабул қилишда кредит тарихи, тадбиркорнинг тоифаси, барқарорлик рейтинги каби талабларни қўллашга йўл қўйилмайди.

Шу билан бирга, тадбиркорларнинг компенсация олиш учун “Тадбиркорликни ривожлантириш компанияси”га амалдаги тартибда бевосита мурожаат қилиш ҳуқуқи сақланади. Бир молиялаштириш бўйича бир хил фоиз харажатларини икки марта компенсация қилишга йўл қўйилмайди.

Фармон билан “Саховат ва кўмак”, “Аёллар дафтари” ва “Ёшлар дафтари” жамғармалари сақлаб қолинади. Бироқ уларнинг маблағларини тасарруф этиш, шунингдек, ушбу маблағлар ҳисобидан ижтимоий ёрдам ва хизматлар кўрсатишни ташкил этиш ваколати туман (шаҳар) штабларига берилади.

Бундан ташқари, 2026 йилда Ижтимоий реестрнинг “давлат таъминотидаги оила” тоифасига киритилган оилалар аъзоларига қўшимча 100 млрд сўм, 2027 йилда эса 300 млрд сўм миқдорида фоизсиз кредитлар ажратилади.

2027 йил 1 январдан аҳолини Ижтимоий реестрга киритишда оиланинг фақат молиявий ҳолати эмас, балки сурункали касалликлар, ногиронлик, ташқи меҳнат миграцияси, оиланинг кўп болалилиги каби мезонлар ҳам ҳисобга олинади.

Шунингдек, меҳнат шартномаси асосида ишлаётган хотин-қизларга ҳомиладорлик ва туғиш таътили тугаганидан фарзанди бир ёшга тўлгунга қадар Давлат ижтимоий суғурта жамғармаси ҳисобидан болани парваришлаш нафақаси тўлаш тартиби жорий этилади.