Олимлар Ой юзасида қадимда мавжуд бўлган эҳтимолий ўзга сайёралик цивилизациялар технологияларининг микроскопик излари сақланган бўлиши мумкинлигини тахмин қилмоқда.

Тадқиқотчилар фикрича, Ердан фарқли равишда Ойда атмосфера ва магнит майдони мавжуд эмас. Шу сабабли у миллиардлаб йиллар давомида коинотдан келган заррачаларни ўзида тўплаб келган. Эҳтимолий сунъий заррачалар Ой тупроғи — реголит таркибида сақланиб қолган бўлиши мумкин.

Компьютерда моделлаштириш натижалари диаметри 3 микрометргача бўлган сунъий заррачалар миллиард йиллик космик сафарни бошдан кечириши мумкинлигини кўрсатган. Олимлар бундай заррачаларни аниқлаш учун бир куб метр Ой тупроғини текшириш зарурлигини ҳисобламоқда.

Ушбу намуналарни сунъий интеллект ва юқори аниқликдаги микроскоплар ёрдамида таҳлил қилиш таклиф этилмоқда.

Мутахассислар ушбу ёндашувни Ердан ташқарида технология мавжуд бўлганини аниқлашнинг янги ва ўзига хос усули сифатида баҳоламоқда.

Хитойнинг «Чанъэ-7» миссияси ва АҚШнинг «Артемида» дастури доирасида Ойдан янги тупроқ намуналарини олиш режалаштирилган. Олимлар келгуси ўн йилликда олинадиган намуналарни таҳлил қилиш орқали бу гипотезани текшириш мумкинлигини билдирмоқда.