Фарғона вилояти Боғдод туманида 20 ёшли йигит бувисини ўлдириб, жиноят изларини яшириш мақсадида унинг уйига ўт қўйган. Унинг тенгдош таниши ҳам жиноятга шериклик қилган.

Суд материалларига кўра, йигит бувисининг уйида кўп миқдорда пул ва қимматбаҳо буюмлар борлигини билган. У танишини Тошкентдан чақириб, хонадонга уй эгаси йўқ вақтида кирган.

Бувиси кутилмаганда уйига қайтиб келганида, йигит унга ошхона пичоғи билан зарба берган. Жабрланувчи оғир тан жароҳати оқибатида вафот этган.

Шундан сўнг улар хонадондан тилла занжир ва зирак, автомобиль монитори ҳамда 2 млн сўм пулни олиб кетган.

Кейин йигит жиноят изларини яшириш учун яна уйга қайтиб, 10 литр бензин сепган ва хонадон ҳамда марҳуманинг жасадига ўт қўйган.

Суд ҳукмига кўра, биринчи судланувчи 17 йилга, унинг шериги эса 16 йилга озодликдан маҳрум қилинди.