Хитойда каналар орқали инсонга юқиши мумкин бўлган янги вирус аниқланди. Олимлар уни Asian longhorned tick nairovirus (ALTNV) деб атаган.

Тадқиқот натижалари «New England Journal of Medicine» журналида эълон қилинган. Хитойлик олимлар кана билан контактдан кейин иситмаси кўтарилган 3163 нафар беморни текширган. Уларнинг 328 нафарида, яъни 10,4 фоизида ALTNV инфекциясига далиллар аниқланган.

Шунингдек, Хитойнинг 15 та провинциясида йиғилган 47 428 та кана текширилганда, уларнинг 1,29 фоизида вирус РНКси топилган. Вирус айниқса Haemaphysalis longicornis — Осиё узуншохли канасида кўпроқ учраган.

ALTNV билан зарарланган беморларда асосан иситма, кучли ҳолсизлик ва ошқозон-ичак тизими билан боғлиқ белгилар кузатилган. Беморларнинг 84 фоизида кучли ҳолсизлик, 80 фоизида ошқозон-ичак муаммолари қайд этилган. Шунингдек, 38 фоизида тромбоцитлар миқдори камайган, 36 фоизида эса жигар фаолиятини кўрсатувчи ферментлар ошган.

Тадқиқотда ALTNV бошқа кана орқали юқадиган вирус — Dabie bandavirus билан бир вақтда учраши мумкинлиги ҳам аниқланган. Бундай қўш инфекция қайд этилган 38 нафар беморнинг 7 нафари вафот этган. Бироқ фақат ALTNV билан зарарланган 56 нафар беморнинг барчаси тўлиқ соғайган.

Олимлар вируснинг инсон саломатлигига узоқ муддатли таъсири ва тарқалиш хусусиятларини аниқлаш учун қўшимча тадқиқотлар зарурлигини таъкидламоқда.

Ҳозирча ALTNVнинг Ўзбекистонда тарқалаётгани ёки маҳаллий каналар орқали юқиши ҳақида маълумотлар мавжуд эмас. Мутахассислар кана чақишидан сақланиш, табиат қўйнида бўлгандан кейин тана ва кийимларни текшириш, ёпиқ кийим кийиш ҳамда ҳимоя воситаларидан фойдаланишни тавсия қилади.