«Астерикс Британияда» комиксининг Альбер Удерзо томонидан чизилган асл муқоваси Льеж шаҳридаги аукционда 1,2 миллион еврога сотилди. Аукцион йиғимлари қўшилганда, лотнинг умумий нархи 1,47 миллион еврога етди. Бу рассом асарлари учун жаҳон рекорди бўлди.

34×47 сантиметр ўлчамдаги бу асар картонда гуашь бўёғида ишланган. У галллар ҳақидаги комикслар сериясининг саккизинчи ҳикояси учун муқова хизматини ўтаган.

Аукциондан олдин асарнинг қиймати 150–200 минг евро атрофида баҳоланган эди. Расмда комикс муаллифларининг дастхати ва бағишлов ёзуви ҳам мавжуд.

Аукцион ташкилотчиларининг таъкидлашича, мазкур асар «Диснейдан мерос қолган динамика, карикатурага хос мимика ва санъат тарихидан ўрин олган нозик деталларни ўзида мужассам этган». Бу ҳақда Belga хабар берди.

«Астерикс» — сценарий муаллифи Рене Госинни ва рассом Альбер Удерзо томонидан яратилган француз комикслари сериясидир. Римликларга қаршилик кўрсатаётган галллар қишлоғи ҳақидаги биринчи ҳикоя 1959 йил 29 октябрда Pilote журналида чоп этилган.

Сериянинг бош қаҳрамонлари — зукко ва топқир Астерикс ҳамда унинг баҳайбат дўсти Обеликс. Комикслар 100 дан ортиқ тилга таржима қилинган, уларнинг умумий адади эса 380 миллион нусхадан ошган.