Британиялик аёл кўчиш олдидан уйдаги буюмларни саралаш жараёнида эри қарийб 50 йил аввал яшириб қўйган олтин тангалар тўпламини тасодифан топди. Бу ҳақда The Independent хабар берди.

Эски темир қути устидан оддий кумуш тангалар турган. Аммо уларнинг остида 41 та Жанубий Африка крюгерранди ва 21 та Британия соверени борлиги аниқланган.

Маълум бўлишича, аёлнинг эри 1970-йилларнинг ўрталарида, иқтисодий инқироз ва юқори инфляция даврида олтин сотиб олган. Ўша вақтда бир крюгерранднинг нархи тахминан 80 фунт стерлинг бўлган.

Қимматбаҳо тангалар завод қадоғи ва уларни сотиб олинганини тасдиқловчи ҳужжатлар билан сақланган. Эр ўзининг бу инвестицияси ҳақида, эҳтимол, яқинларига ҳам айтмаган.

50 йилдан кейин топилган коллекция кимошди савдосига чиқарилди. 41 та крюгерранд тахминан 100 минг фунт стерлингга, 21 та британ соверени эса яна қарийб 13 минг фунт стерлингга сотилган.