Ўзбекистонда электромобил ва гибрид автомобилларга талаб ортиб бормоқда. 2026 йил январь–август ойларида мамлакатга 79 минг 46 та енгил автомобиль импорт қилинган. Уларнинг умумий қиймати 1,1 млрд долларни ташкил этган.

Импорт таркибида электромобиллар етакчилик қилган. Ҳисобот даврида хориждан 54 минг 826 та электромобил олиб кирилган. Бу ўтган йилнинг мос даврига нисбатан 14 минг 519 тага кўп. Электромобиллар импортининг умумий қиймати эса 614 млн долларни ташкил этган.

Гибрид автомобиллар импорти ҳам қарийб 5 бараварга ошган. 2025 йилнинг январь–август ойларида 2 261 та гибрид олиб кирилган бўлса, 2026 йилнинг шу даврида бу кўрсаткич 11 130 тага етган. Уларнинг умумий қиймати 55 млн доллардан 240 млн долларга кўтарилган.

Бензинли автомобиллар импортида эса аксинча, пасайиш кузатилган. 8 ойда 13 минг 70 та бензинли автомобиль импорт қилинган бўлиб, бу ўтган йилга нисбатан 481 тага ёки 3,5 фоизга кам.

Шунингдек, ҳисобот даврида 20 та дизель автомобил ҳам импорт қилинган.

Умуман, 2026 йилнинг дастлабки 8 ойида импорт қилинган енгил автомобилларнинг:

• 69,4 фоизи — электромобиллар;
• 16,5 фоизи — бензинли автомобиллар;
• 14,1 фоизи — гибрид автомобиллар ҳиссасига тўғри келган.

Электромобиллар импорти ойлар кесимида ҳам ўсиш тенденциясини кўрсатган: январда 4 548 та, февралда 5 152 та, мартда 6 662 та, апрелда 6 716 та, майда 6 952 та, июнда 7 845 та, июлда 8 875 та ва августда 8 076 та электромобиль олиб кирилган.

Мутахассислар ва бозор иштирокчилари электромобилларга қизиқиш ортишида ёқилғи харажатлари, бензин, пропан ва метан бозоридаги нарх ўзгаришлари, шунингдек, электромобиллар учун белгиланган имтиёзлар муҳим омиллардан бири бўлаётганини таъкидламоқда.

Айни пайтда электромобиллар импорти учун божхона божи ва акциз солиғининг 0 фоиз этиб белгилангани ҳам ушбу турдаги автомобиллар бозори кенгайишига таъсир қилувчи омиллардан бири ҳисобланади.