Ўзбекистон Президенти Шавкат Мирзиёев 2030 йилга бориб Марказий Осиё давлатларининг Корея Республикаси билан савдо айланмасини 20 млрд долларга етказишни таклиф қилди.

Бу ташаббус 16 сентябрь куни Сеулда ўтказилган биринчи «Марказий Осиё – Корея Республикаси» саммитида илгари сурилди. Президент ҳамкорликни ривожлантириш бўйича бешта стратегик йўналишни таклиф этди.

Хусусан, узоқ муддатли «Марказий Осиё – Корея Республикаси: жадал ривожланиш йўлидаги ҳамкорлик» концепциясини ишлаб чиқиш ва йирик лойиҳалар портфелини шакллантириш таклиф қилинди. Шунингдек, киберхавфсизлик соҳасида ҳамкорликни кучайтириш зарурлиги қайд этилди.

Саноат-технология парки ташкил этилади

Савдо-иқтисодий ва инвестициявий ҳамкорлик доирасида Ўзбекистонда «Марказий Осиё – Корея» саноат-технология паркини ташкил этиш таклиф қилинди.

Унда автомобиль компонентлари, электротехника, машинасозлик, фармацевтика ва кимё саноати маҳсулотларини ишлаб чиқаришга эътибор қаратилиши кўзда тутилмоқда. Савдо тўсиқларини бартараф этиш, сертификатлаш тартибларини соддалаштириш ҳам таклифлар қаторида.

Нодир минераллар бўйича альянс

Шавкат Мирзиёев Марказий Осиё ва Корея ўртасида нодир минераллар бўйича минтақавий инвестициявий альянс ташкил этишни ҳам таклиф қилди.

Ташаббус геология-қидирув ишлари ва қазиб олишдан тортиб, хомашёни чуқур қайта ишлаш ҳамда юқори қўшилган қийматга эга маҳсулотлар ишлаб чиқаришгача бўлган жараёнларни қамраб олувчи саноат кластерларини ташкил этишни назарда тутади.

«Яшил» иқтисодиёт ва кадрлар тайёрлаш

Яна бир йўналиш Марказий Осиё ва Корея ўртасида иқлим ва углерод ҳамкорлигини йўлга қўйишга қаратилган. Бунда Корея технологияларини трансфер қилиш, энергетик ўтиш ва ҳаво сифати бўйича қўшма лойиҳаларни амалга ошириш таклиф этилди.

Инсон капиталини ривожлантириш бўйича ҳамкорликни эса «буюртма – ўқитиш – бандлик» тамойили асосида ташкил этиш таклиф қилинди. Шунингдек, Корея бизнесининг кадрларга бўлган эҳтиёжини Марказий Осиёдаги таълим имкониятлари билан боғлаш ва сунъий интеллект технологияларини биргаликда ишлаб чиқиш ташаббуси илгари сурилди.