Германиянинг Бавария федерал ери адлия вазири Георг Айзенрайх лавозимини тарк этиш ниятида эканини маълум қилди. У сиёсатдан кетгач, адвокатлик фаолиятини қайта тиклаш ва сиёсий сатира жанридаги кабаре чиқишлари учун матнлар ёзишга кўпроқ вақт ажратмоқчи.

55 ёшли Айзенрайх бутун фаолиятини сиёсатга бағишлашни ҳеч қачон режалаштирмаганини айтди. У янги ишларни бошлаш учун ҳали етарлича ёш эканини таъкидлаган.

Айзенрайх 2018 йил охиридан буён Бавария адлия вазири лавозимида ишлаб келмоқда. У Германиядаги адлия вазирлари орасида энг узоқ вақтдан бери ўз лавозимида ишлаётган раҳбар ҳисобланади.

Жорий йил июнь ойида Айзенрайх Мюнхендаги хайрия тадбирида Германияда танилган кабаре артистлари Джанго Азюль ва Луиза Кинзехер билан бирга сиёсий сатира дастурида саҳнага чиққан.

У сентябрь ойи охирига қадар вазирлик лавозимини тарк этишни режалаштирмоқда. Қонунчилик муддати якунланганидан кейин эса депутатлик ваколатларидан ҳам воз кечмоқчи.

N-TV телеканали хабар беришича, Бавария бош вазири Маркус Зёдер Айзенрайхнинг ўрнига ким тайинланиши масаласи келаси ҳафта Христиан-ижтимоий иттифоқи (ХСС)нинг ландтагдаги фракцияси йиғилишида ҳал этилишини билдирган.

Бавария ландтагига навбатдаги сайловлар 2028 йил кузида бўлиб ўтиши белгиланган.