Британиянинг Сассекс графлигидаги Кроуборо шаҳри аҳолиси ҳудудда мигрантларни жойлаштиришга қарши намойиш ўтказди.

Норозиликка шаҳар яқинидаги ҳарбий казармаларда бошпана сўраган мигрантларни вақтинча жойлаштириш бўйича ҳукумат қарори сабаб бўлган.

Маълум қилинишича, ҳукумат январь ойидан бошлаб Кроуборо яқинидаги собиқ ҳарбий ўқув лагерида мигрантларни жойлаштира бошлаган. Айни пайтда объектда 350 нафар мигрант бор. Ҳукумат лагер сиғимини 540 кишигача оширишни режалаштирмоқда.

Намойиш иштирокчилари «Кроуборо мигрантларга йўқ дейди» мазмунидаги плакатлар билан кўчага чиққан. Акция ҳарбий объект ҳудудидан бошланиб, шаҳар марказида давом этган.

Шу билан бирга, мигрантларни қўллаб-қувватловчи фуқаролар ҳам қарши намойиш ўтказган. Улар «Мигрантларни хуш кўрамиз», «Меҳрибонлик — бизнинг кучимиз» ва «Биргаликда биз кучлироқмиз» каби шиорлар ёзилган плакатларни кўтарган.

Февраль ойида Лондон Олий суди Кроуборо фаолларининг мигрантларни ҳарбий ўқув лагерига жойлаштириш қарорини бекор қилиш ҳақидаги даъосини қаноатлантирмаган.

Аввалроқ Оксфордшир графлигидаги Пиддингтон аҳолиси Британия таркибидан чиқиш ғоясини қўллаб-қувватлагани хабар қилинган эди. 15 сентябрда ўтказилган овоз беришда 285 киши ажралиб чиқишни қўллаб-қувватлаган, 26 киши эса қарши чиққан.