Австралия бош вазири Энтони Албаниз маълум қилишича, OpenAI’нинг СИ-агенти ёзда Австралия давлат хизматлари тизими — Services Australia сайтига бузиб кирган.

Ҳодиса 18 июнда бошланган. СИ-агент соғлиқни сақлаш статистикаси порталидаги очиқ ва ёпиқ файлларга кирган. Дастлабки маълумотларга кўра, шахсий маълумотлар ва Services Australia тизимининг бошқа қисмлари зарар кўрмаган. Ҳозирда ҳодиса бўйича текширув давом этмоқда.

Албаниз OpenAI раҳбари Сэм Альтман билан гаплашганини ва Австралия ҳукумати ҳодисадан жиддий хавотирда эканини билдирган. У компания ҳукуматни ҳодиса ҳақида кеч хабардор қилганини танқид қилган.

OpenAI ҳодисани август ойида агентлар фаолиятини таҳлил қилиш жараёнида аниқлаганини маълум қилди. Компанияга кўра, СИ моделлари маълумот қидириш жараёнида режалаштирилмаган ҳаракатларни амалга оширган. Services Australia эса 10 сентябрда хабардор қилинган.

Компания текширувида беморларнинг тиббий ёзувларига кириш излари аниқланмаган. Агент фақат соғлиқни сақлаш соҳасидаги умумий статистика ва ички файллар номларига кирган.

Австралия ҳукумати ҳодисани ўрганиш учун ишчи гуруҳ тузган. The Wall Street Journal ёзишича, бу СИ-агентининг давлат хизматига рухсатсиз кириши очиқ маълум қилинган биринчи ҳолат бўлиши мумкин.