АҚШда федерал суд Алабама штатида яшовчи Чарльз Макрорининг ҳукмини бекор қилди. У хотинини ўлдиришда айбланиб, қарийб 40 йил қамоқда ўтирган. Ишни қайта кўриб чиқишга айбловнинг асосий далили бўлган тиш излари экспертизасининг ишончсизлиги сабаб бўлди.

24 ёшли Жули Макрори 1985 йил 31 май куни Андалусия шаҳрида ўлик ҳолда топилган. Жиноят жойидан ДНК ёки бошқа муҳим далиллар аниқланмаган. Айблов марҳуманинг елкасида қолган тиш изларига асосланган.

Эксперт-стоматолог Ричард Сувирон ушбу излар Чарльз Макрорининг тишларига мос келишини билдирган. 1986 йилда у айбдор деб топилиб, умрбод озодликдан маҳрум қилинган. Бироқ Макрори бошиданоқ ўз айбини инкор қилиб келган.

Кейинчалик тиш излари бўйича бундай экспертиза усули илмий жиҳатдан асоссиз деб баҳолана бошлаган. 2019 йилда Сувироннинг ўзи ҳам қасамёд остида аввалги хулосаларидан воз кечган. У марҳуманинг жасадини шахсан кўрмагани, экспертизани фақат сурат асосида ўтказганини тан олган.

Суд прокуратурага олти ой муҳлат берди. Бу вақт ичида айблов томони янги ва муҳим далилларни тақдим этиши ёки Макрорига қўйилган айбловларни бекор қилиши керак.

2020 йилда Макрорига айбини тан олиш эвазига озодликка чиқиш таклиф қилинган. Аммо у бу таклифни рад этган ва ўзи содир этмаган жиноятни тан олмаслигини билдирган.