АҚШнинг шимоли-шарқий ҳудудларини кучли довул қамраб олди. Кучли шамол дарахтларни қулатиб, кўчаларни сув босишига ва электр таъминотида узилишларга сабаб бўлди.

Нью-Йорк шаҳрида довул пайтида қулаган дарахт 56 ёшли уй-жой бошқармаси ходимининг ўлимига сабаб бўлди. Воқеа Бруклин ҳудудида содир бўлган. Эркак оғир аҳволда шифохонага етказилган, аммо шифокорлар унинг ҳаётини сақлаб қола олмаган.

Нью-Жерсида шамол тезлиги секундига 33 метрга, Массачусетсда эса 31,3 метрга етган. Нью-Йорк штатида 21 мингдан ортиқ абонент электр таъминотисиз қолган. Коннектикутда қарийб 21 минг, Массачусетсда эса 10 мингга яқин абонентда электр таъминоти узилган.

Шунингдек, минтақанинг соҳилбўйи ҳудудларини сув босган. Нью-Йорк шаҳрининг Куинс туманида айрим аҳоли кўчаларда каякларда ҳаракатланган.

Нью-Йорк губернатори Кэти Хокул аҳолини ноқулай об-ҳаво шароити яхшилангунга қадар уйда қолишга чақирди.