Наркожиноятларга қарши курашишда замонавий технологиялар ва илмий ёндашувлардан фойдаланишни рағбатлантиришга қаратилган қонун лойиҳаси депутатлар томонидан қабул қилинди.

Лойиҳада наркожиноятлар ҳақида хабар берган ёки уларга қарши курашишга кўмаклашган шахсларни рағбатлантириш, шунингдек, уларнинг шахсига доир маълумотлар сир сақланишини кафолатлаш назарда тутилмоқда.

Бундан ташқари, соҳадаги илмий, амалий ва технологик тадқиқотларни қўллаб-қувватлаш бўйича нормалар ҳам белгиланмоқда.

Депутатлар қонун лойиҳасини ишлаб чиқишда хорижий давлатларнинг ушбу соҳадаги тажрибаси ўрганилиб, мақбул механизмлар инобатга олинганини таъкидлади.

Қонун лойиҳаси қабул қилиниб, Сенатга юборилди.