Нидерландия бош вазири Роб Йеттен ва у раҳбарлик қилаётган «Демократлар-66» (D66) партиясининг ижтимоий тармоқлардаги юзлаб постлари сунъий интеллект ёрдамида тайёрлангани аниқланди. Мутахассислар 2021 йилдан буён сиёсатчи ва партия саҳифаларида эълон қилинган 1,8 мингдан ортиқ хабарни таҳлил қилиб чиқди.

Таҳлил натижаларига кўра, камида 232 та матн сунъий интеллект томонидан яратилган. Шундан 68 таси Йеттенга, 164 таси эса D66 партиясига тегишли. Қайта эълон қилинган постларни ҳам ҳисобга олганда, бундай матнлар жами 434 марта жойлаштирилган.

Сунъий интеллект ёрдамида тайёрланган постлар 2025 йил 4 июндан бошлаб мунтазам равишда пайдо бўлган. Шу санадан кейин уларнинг умумий постлар орасидаги улуши 30 фоизни ташкил этган.

Тадқиқот жараёнида Pangram детектори ва лингвистик таҳлил усулларидан фойдаланилган.

Аниқланган матнлар орасида Йеттеннинг Вестерборк концлагерига ташрифи ҳақидаги пости ҳам бор. Унда бош вазир биринчи шахс номидан гапириб, гўёки ўз шахсий кечинмаларини баён қилган.

Шунингдек, Йеттеннинг автобиографик китобининг камида бир ярим саҳифасида ва D66 партиясининг сайловолди кампанияси учун тайёрланган учта ролик матнида ҳам сунъий интеллектдан фойдаланилгани аломатлари топилган.

Партия китобни тайёрлашда сунъий интеллектдан фойдаланилганини тасдиқлаган, аммо роликларнинг якуний матнлари ИИ томонидан яратилганини рад этган.

Амстердам университети профессори Клас де Вресе бу амалиёт бош вазирга бўлган ишончга жиддий путур етказиши мумкинлигидан огоҳлантирди.

Унинг таъкидлашича, сунъий интеллект моделлар инсонда муайян сохта таассурот уйғотадиган матнларни яратиши мумкин, аммо улар ҳар доим ҳам муаллифнинг ҳақиқий ҳис-туйғуларини акс эттирмайди. Бу эса фуқароларда «аслида ҳақиқий Роб Йеттен ким?» деган ҳақли савол пайдо бўлишига олиб келиши мумкин.