Ўзбекистонда тижорат банкларининг кредит ва кафиллик тўловларини мижоз карталаридан автоматик ечиб олишига чеклов жорий этилади. Бу Марказий банк бошқарувининг қарорида белгиланган.

Ҳужжат билан банк хизматлари истеъмолчилари билан ўзаро муносабатларни амалга оширишда тижорат банклари фаолиятига қўйиладиган минимал талаблар тўғрисидаги низомга қўшимча киритилмоқда.

Унга кўра, банк билан мижоз ўртасида тузилган шартнома асосида кредит ёки кафиллик тўловларини мижознинг алоҳида топшириғисиз ечиб олишга чеклов белгиланади.

Хусусан, банклар бундай тўловларни ундиришда мижознинг барча банк карталаридаги ҳисобварақларида жами меҳнатга ҳақ тўлашнинг энг кам миқдорининг ярмига тенг маблағни сақлаб қолиши керак.

Ҳозирда ушбу миқдор 680 минг сўмни ташкил этади. Яъни банк кредит ёки кафиллик тўловини автоматик ундирганда, мижознинг барча банк карталаридаги жами қолдиқ 680 минг сўмдан камайиб кетишига йўл қўйилмайди.

Мазкур чеклов кредит ва кафиллик тўловлари бўйича мижознинг топшириғисиз амалга ошириладиган пул ечиш операцияларига тааллуқли.

Қарор расмий эълон қилинган кундан уч ой ўтгач, 2027 йил 10 январдан кучга киради.