АҚШнинг Жоржия штатида маиший низо билан боғлиқ отишма оқибатида беш киши ҳалок бўлди. Ҳуқуқ-тартибот идоралари гумонланувчи ўз жонига қасд қилган бўлиши мумкинлигини билдирмоқда.

New York Times нашри маҳаллий полиция вакилларига таяниб хабар беришича, ҳодиса Дуглас шаҳрида содир бўлган. Отишма оилавий зўравонлик билан боғлиқ бўлган.

Маҳаллий полиция бошқармаси раҳбари Бреннен Пруэтнинг журналистларга маълум қилишича, воқеадан бир неча соат олдин бир аёл турмуш ўртоғининг уй ичида чекишидан шикоят қилиб, ҳуқуқ-тартибот идораларига мурожаат қилган.

Кейинчалик ўқ овозлари ҳақидаги хабарлардан сўнг полиция ходимлари воқеа жойига етиб борган. У ерда тўрт кишининг жасади топилган. Яна бир киши жароҳатланган бўлиб, кейинчалик шифохонада вафот этган.

Ҳозирча жиноятнинг аниқ сабаблари маълум эмас. Ҳуқуқни муҳофаза қилувчи органлар гумонланувчи ўз жонига қасд қилган бўлиши мумкинлигини тахмин қилмоқда. Бироқ отишмада иштирок этган шахсларнинг аниқ сони расман маълум қилинмаган.