Малайзияда яшовчи 64 ёшли аёл Сингапурда катта миқдорда қарз тўплаган ўғли билан барча алоқаларини узишини эълон қилди. У аввалроқ ўғлининг қарзларини тўлаш учун 30 минг малайзия ринггити сарфлаганига қарамай, кредиторлар томонидан таҳдидларга дуч келган. Бу ҳақда Mothership нашри хабар берди.

Хо фамилияли аёлнинг айтишича, унинг 34 ёшли ўғли бир муддат аввал ишлаш учун Сингапурга кетган. У ерда турли шахслардан қарз олиб, пулларни қайтармаган. Онаси ўғли хатосини тушуниб, ҳаётини янгидан бошлашидан умид қилиб, унинг қарзларини тўлаб беришга қарор қилган.

Бироқ 30 сентябрь куни аёлга Сингапурдан таҳдидли хабар келган. Номаълум шахслар ўғлининг 12,2 минг сингапур доллари миқдоридаги қарзини қайтармаса, унинг уйини бўёққа белашларини билдирган. Бу вақтда ўғли онаси билан алоқани бутунлай узган эди.

Кейинчалик кредиторлар аёлдан яна 20 минг сингапур доллари талаб қилиб, акс ҳолда уйига ўт қўйиш билан таҳдид қилишган. 5 октябрь куни эса унинг уйи ҳақиқатан ҳам бўёққа белаб кетилган.

Шундан сўнг аёл омма олдида ўғлидан воз кечишини ва у билан барча алоқаларни узишини маълум қилган. Унинг таъкидлашича, ўзи ва яқинлари доимий қўрқув остида яшашдан чарчаган.