Францияда шанба куни юз берган оммавий тартибсизликлар вақтида қўлга олинганлар сони 2 мингдан ошди. Ҳуқуқни муҳофаза қилувчи органлар ходимлари ва ўт ўчирувчилардан 600 нафардан ортиғи жароҳат олган. Бу ҳақда Франция ички ишлар вазири Лоран Нуньес маълум қилди.

Вазирнинг таъкидлашича, жабрланганлар ҳақидаги маълумотлар дастлабки бўлиб, кейинчалик аниқлаштирилиши мумкин.

Тартибсизликлар иштирокчиларининг ҳаракатлари оқибатида бир неча юз нафар дўкон эгаси ҳам зарар кўрган. Нуньес республика тартибсизлик ва зўравонлик тарқатишга интилувчиларга ҳеч қандай ён бермаслигини билдирди.

Маълумотларга кўра, 17 октябрь куни Франция кўчаларига ярим миллиондан ортиқ киши чиққан. Парижнинг ўзида намойишчилар сони тахминан 100 минг нафарни ташкил этган.

Намойишлар давомида иштирокчилар биноларнинг ойна ва витриналарини синдирган, автомобиллар ва чиқинди контейнерларига ўт қўйган ҳамда баррикадалар қурган. Хавфсизлик кучлари эса тартибсизликларни бартараф этиш учун резина таёқлар, кўздан ёш оқизувчи газ, шовқинли гранаталар ва сув сепувчи машиналардан фойдаланган.

Франциядаги тартибсизликлар сентябрь ойи охирида Парижнинг шимолий қисмидаги кам таъминланган аҳоли яшайдиган шаҳар атрофи ҳудудларида бошланган. Намойишларга мактабларда ўқитувчилар етишмаслиги ва болалар учун таълим шароитлари ёмонлиги сабаб бўлган. Кейинчалик ўсмирларга радикал гуруҳлар ҳам қўшилган.