Бразилиялик 49 ёшли тош терувчи Эдмар Мартинс ижтимоий тармоқларда танишган аёл билан учрашиш учун қарийб 2 минг километр йўл босди. Бироқ у умрининг муҳаббати деб билган Жессика Оливейра аслида мавжуд эмаслиги, унинг қиёфаси сунъий интеллект ёрдамида яратилгани маълум бўлди.

Мартинс Жессиканинг саҳифасини илк бор 2020 йилда ижтимоий тармоқларда кўрган. Уни ҳақиқий инсон деб ўйлаган эркак аёл билан учрашишга қарор қилган. Бунинг учун у шахсий буюмларини сотиб, 9 октябрь куни Мараньян штатидан Белу-Оризонти шаҳрига йўл олган.

Бироқ манзилга етиб боргач, Жессикани топа олмаган. Кейинчалик у аёлнинг виртуал образ эканини билган.

Маълум бўлишича, сунъий интеллект ёрдамида яратилган Жессиканинг TikTok тармоғида қарийб 300 минг обуначиси бор. Унинг видеоларида виртуал қаҳрамон бўлажак жуфтига ўз фермасида фаровон ҳаёт ваъда қилган.

Бор-будидан айрилиб, маблағсиз қолган Мартинс маҳаллий ҳокимиятдан ёрдам сўрашга мажбур бўлган. Масъуллар унинг уйига қайтишига кўмаклашган.

Аккаунтни бошқарувчи шахс Жессика сунъий интеллект ёрдамида яратилганини тасдиқлаган. Бироқ у Мартинс билан шахсан мулоқот қилмаганини ва эркакни учрашувга таклиф этмаганини билдирган.

Шунга қарамай, Мартинс ҳақиқий муҳаббатни топиш умидидан воз кечмаган. Ҳозирда у қариндошиникида вақтинча яшамоқда ва яна Белу-Оризонтига боришни режалаштирмоқда. Эркак айнан шу шаҳарда ўз бахтини топишига ишонмоқда.