Куни кеча ижтимоий тармоқда Тошкентдаги ресторанлардан бирининг ходими ва курьер ўртасида жанжал юзага келгани акс этган видео тарқалди. 

Жиноят ишлари бўйича Миробод туман судининг 2026 йил 18 октябрдаги қарорига кўра, воқеа 17 октябрь куни соат тахминан 15:30 да Ислом Каримов кўчасида жойлашган ресторан олдида содир бўлган.

Суд материалларида қайд этилишича, ресторан ходими С.Р. ресторан олдидан скутерда ўтиб кетаётган 17 ёшли курьерни уятли сўзлар билан ҳақорат қилган. Ҳайдовчи судда айбига қисман иқрор бўлиб, курьернинг скутерда мижозлар ўтирган жойдан ўтиши сабабли унга эътироз билдирмоқчи бўлганини, ўртадаги келишмовчилик натижасида жаҳл устида сўкинганини айтган. Шунингдек, қилмишидан пушаймонлигини билдирган.

Суд С.Р.нинг ҳаракатларини Маъмурий жавобгарлик тўғрисидаги кодекснинг 183-моддаси — майда безорилик деб баҳолади. Унга нисбатан беш сутка маъмурий қамоқ жазоси тайинланди.

Тошкент шаҳар ҳокимлиги ахборот хизмати маълумотига кўра, воқеадан кейин «Мовий гумбазлар» хиёбонидаги рестораннинг ёзги майдончаси жойлашуви текширилган. Текширувда ҳудуддан фойдаланиш, жумладан, пиёдаларнинг эркин ҳаракатланишига оид талаблар бузилгани аниқланган. Шундан сўнг йўлак рестораннинг стол-стулларидан бўшатилган.

Ресторан маъмурияти ўз муносабатида йўлак пиёдалар, болалар аравачаси билан ҳаракатланувчилар ва имконияти чекланган шахслар учун очиқлигини билдирган. Шу билан бирга, ходимлар мазкур ҳудудда мотоцикл ва мопедларда ҳаракатланмасликни сўрашини қайд этган.

Маъмурият можаро ҳолатлари ва кузатув камералари ёзувлари ўрганилаётганини, ходимларнинг қўпол муомаласи ва таҳдидларига йўл қўйилмаслигини маълум қилган. Кейинчалик можарода иштирок этган ҳайдовчи курьердан узр сўраб, қилмишидан пушаймонлигини билдирган.