Америкалик футуролог Рэй Курцвейл 2045 йилга бориб инсон мияси ва сунъий интеллект ўртасидаги алоқа шу даражада кучайиши мумкинки, одамлар ўз тафаккури ва жисмоний имкониятларини технологиялар ёрдамида кенгайтиришга эришади, деб ҳисоблайди. Бу ҳақда Popular Mechanics нашри хабар берди.

Футурологнинг 2024 йилда чоп этилган The Singularity Is Nearer китобида баён этилган қарашларига кўра, инсон ва технологияларнинг бирлашуви аллақачон бошланган. Масалан, Neuralink каби нейроинтерфейслар айрим беморларга мия сигналлари орқали компьютерни бошқариш имконини бермоқда. Келгусида эса нанотехнологиялар ва мия-компьютер интерфейслари инсоннинг ахборотни қабул қилиш ва қайта ишлаш имкониятларини янада кенгайтириши мумкин.

Курцвейл, шунингдек, инсоннинг рақамли излари — ёзишмалари, овозли хабарлари ва бошқа маълумотлари асосида унинг мулоқот услуби ва хулқ-атворини тақлид қилувчи рақамли нусхалар яратилиши мумкинлигини таъкидлайди. Унинг прогнозларига кўра, 2030-йиллар охирига бориб инсон тафаккурида биологик бўлмаган тизимларнинг роли сезиларли даражада ошиши мумкин.

Бироқ бундай истиқбол шахсий маълумотлар хавфсизлиги, рақамли нусхаларнинг ҳуқуқий мақоми ва технологиялар устидан назорат каби муаммоларни ҳам келтириб чиқаради. Назоратдан чиққан нанороботлар ҳақидаги «кулранг шиллиқ» сценарийси ҳам технологик хавфлардан бири сифатида тилга олинади, аммо бу ҳозирча назарий гипотеза ҳисобланади.

Шу билан бирга, инсон онгини рақамли муҳитга кўчириш ёки инсон ва сунъий интеллектни тўлиқ бирлаштириш имконияти ҳозирча илмий жиҳатдан исботланмаган. Шу сабабли Курцвейлнинг 2045 йилга оид қарашлари аниқ натижа эмас, балки технологик тараққиёт ҳақидаги футурологик башоратдир.