Ҳукуматнинг 2026 йил 22 октябрдаги қарори билан лифтлардан фойдаланиш ва уларга техник хизмат кўрсатишнинг янги тартиби белгиланди. Янги тартиб 2027 йил 1 январдан кучга киради.

Қарорга кўра, лифтларни рўйхатга олиш, уларга техник хизмат кўрсатиш бўйича шартномалар тузиш ва бекор қилиш, хизмат натижаларини қайд этиш ҳамда сақлаш «Хавфсиз лифт» ягона идоралараро электрон платформаси орқали амалга оширилади.

Лифтлар ваколатли орган томонидан бепул рўйхатга олинади. Дастлабки техник кўрикдан ижобий ўтган лифт икки иш куни ичида рўйхатга олиниб, буюртма берувчига QR-кодли маълумотнома юборилади.

Бино бошқарувчиси лифтга ҳар ойда камида бир марта техник хизмат кўрсатилишини таъминлаши шарт. Лифт кабинасида унинг идентификация рақами, рўйхатдан ўтгани ҳақидаги QR-код, бино бошқарувчиси ва техник хизмат кўрсатувчи ташкилотнинг номи, манзили ҳамда алоқа маълумотлари бўлиши лозим.

Шунингдек, электрон платформа орқали сотиб олинмаган ва ўрнатилмаган лифтлар ҳамда эҳтиёт қисмлардан фойдаланиш тақиқланади.

Йўловчи ташишга мўлжалланган лифтларда қурилиш материаллари, қурилиш чиқиндилари, лифт габаритига мос келмайдиган буюм ва жиҳозларни, шунингдек, портловчи, тез алангаланувчи, радиоактив ва ўта заҳарли моддаларни ташишга йўл қўйилмайди.

Ўрнатувчи томонидан муомалага чиқарилган ҳар бир лифтга камида уч йиллик кафолат берилади. Кафолат даврида таъмирлаш ва лифт қисмларини алмаштириш ишлари 15 кундан ошмаслиги керак.

Фойдаланиш тақиқлангани ҳақида қизил ёрлиқ билан белгиланган лифтга тақиқ амал қилган даврда техник хизмат кўрсатилмайди. Бу вақт учун техник хизмат кўрсатувчи ташкилот бино бошқарувчисидан ойлик хизмат ҳақини талаб қила олмайди.

Техник хизмат кўрсатувчи ташкилотлар реестрига кириш онлайн хабар бериш орқали бепул амалга оширилади.