Кенияда Эбола вирусини юқтирган иккинчи бемор вафот этди. Мамлакатда касаллик юқтиришнинг жами тўққизта ҳолати расман тасдиқланган, қолган етти нафар бемор шифохоналарда даволанмоқда.
Bloomberg агентлигининг 24 октябрь куни мамлакат Соғлиқни сақлаш вазирлиги маълумотларига таяниб хабар беришича, вирусдан вафот этган иккинчи бемор 65 ёшли аёл бўлган. У касаллик аниқланган биринчи беморнинг яқин қариндоши ҳисобланади.
Вазирлик маълумотига кўра, аёл карантинда бўлган, унда касалликнинг дастлабки белгилари 13 октябрда кузатилган. Ҳозирда қолган беморлар иккита ихтисослаштирилган изоляция бўлимида даволанмоқда.
Аввалроқ, 20 октябрь куни АҚШ Давлат департаменти Эбола вируси тарқалиши билан боғлиқ хавфлар сабабли америкаликларга Кенияга сафар қилиш режаларини қайта кўриб чиқишни тавсия қилган эди.
Сўнгги янгиликлар