Бразилияда паррандалар орасида Ньюкасл касаллигининг иккинчи ҳолати қайд этилди. Касаллик мамлакатнинг Санта-Катарина штатидаги паррандачилик хўжалигида аниқланган. Зарарланган паррандаларни йўқ қилиш бошланган.

Вазият сабаб ветеринария хизматлари паррандачилик хўжаликларидаги текширувларни кучайтириб, йўлларда санитария назорат постларини ташкил этган.

Касалликнинг аниқланиши Бразилиянинг парранда гўшти экспортига ҳам таъсир кўрсатмоқда. The Rio Times нашри хабар беришича, Бразилия дунёдаги энг йирик парранда гўшти экспортчиси бўлиб, жаҳон экспортининг 36 фоизи унинг ҳиссасига тўғри келади.

Ҳозиргача Мексика ва Малайзия Бразилиядан паррандачилик маҳсулотлари импорт қилишни тўлиқ тўхтатган. Хитой, Саудия Арабистони ва Чили каби йирик харидорлар эса Санта-Катарина штатида етиштирилган паррандалар гўшти импортига вақтинча тақиқ жорий этган.

Янги ҳолатлар қайд этилиши Бразилия маҳсулотларига нисбатан импорт чекловлари узайтирилиши хавфини оширмоқда.