Қозоғистон президенти Қосим-Жомарт Тўқаев йирик бойлик эгалари учун оширилган солиқ ставкасини жорий этиш масаласини муҳокама қилишни таклиф қилди. Бу борада ҳукумат ва Қурултойга тегишли таклифлар ишлаб чиқиш вазифаси юклатилди.

Президент солиқ сиёсати адолатли бўлиши, шунингдек, солиқ тизимида шаффофликни таъминлаш зарурлигини таъкидлади. У қонуний йўл билан орттирилган мол-мулк ва бойликларни чеклаш ҳақида гап кетаётгани йўқлигини қайд этди.

Тўқаев солиқ маъмурчилигида рақамлаштиришни тўлиқ жорий этиш ва сунъий интеллект имкониятларидан фойдаланиш орқали солиқ йиғимларини ошириш, яширин иқтисодиётни қисқартириш ҳамда коррупция хавфларини камайтириш зарурлигини айтди.

Шунингдек, давлат раҳбари янги Солиқ кодексидаги зиддиятли ва турлича талқин қилиниши мумкин бўлган нормаларни қайта кўриб чиқиш, тадбиркорлар билан маслаҳатлашган ҳолда мақсадли ўзгартишлар киритиш муҳимлигини таъкидлади. Унинг фикрича, солиқ қоидаларини тез-тез ўзгартиришдан қочиш керак.