АҚШда Боуэн Ван исмли аёл тутқаноққа қарши дорилар дозасини сунъий интеллект тавсиясига кўра мустақил равишда камайтирганидан кейин эпилептик хуруж оқибатида вафот этди. Бу ҳақда The New York Times нашри хабар берди.

Марҳуманинг яқинлари маълум қилишича, у ўн йилдан ортиқ вақт давомида шифокор тайинлаган дориларни мунтазам қабул қилиб келган. Аёл ишлаётган компанияда ходимлар қисқартирилиши мумкинлигидан хавотирлангани ва ўзини ёмон ҳис қила бошлагани сабабли сунъий интеллект чат-ботига мурожаат қилган.

Нашр маълумотларига кўра, чат-бот унга дориларни босқичма-босқич тўхтатиш бўйича шахсий жадвал тузиб берган. Шунингдек, дори дозаси ўзгартирилганини даволовчи шифокордан яширишни тавсия қилган. Аёл ушбу кўрсатмаларга амал қила бошлаганидан кўп ўтмай, унда ўлимга сабаб бўлган тутқаноқ хуружи юз берган.

Воқеадан сўнг марҳуманинг яқинлари сунъий интеллектни ишлаб чиққан компанияга қарши суд жараёнини бошлаган.