Германияда бир ўқитувчи аёл 16 йил давомида ишга чиқмасдан, касаллик варақалари асосида тўлиқ маош олиб келган. Қизиғи, у бу вақт давомида ўз бизнесини йўлга қўйган, косметик воситалар сотган ва дайвинг билан ҳам шуғулланган. Айни пайтда аёл фирибгарликда гумонланмоқда.

62 ёшли аёл 2003 йилдан Везель шаҳридаги бизнес-коллежда ўқитувчи бўлиб ишлаган. Бироқ 2009 йилда сурункали касаллиги ва руҳий саломатлиги билан боғлиқ муаммоларни сабаб қилиб, ишга чиқмай қўйган. Шундан кейин у мунтазам равишда касаллик варақаларини тақдим этиб, маош олишда давом этган.

Тергов маълумотларига кўра, аёл шу йўл билан давлатдан ноқонуний равишда қарийб 250 минг евро олган. Бу 22 миллион рублдан ортиқ маблағга тенг.

Аслида, амалдаги тартибга кўра, касаллик варақаси бошланганидан уч ой ўтгач, ўқитувчи мустақил тиббий кўрикдан ўтиши лозим бўлган. Аммо у ушбу талабни бажармаган. Шунга қарамай, унинг меҳнатга лаёқатсизлиги тўғрисидаги ҳужжатлар қарийб 20 йил давомида расмийлаштириб келинган.

Эътиборлиси, ўқитувчи ишга чиқмаган йилларида бекор ўтирмаган. У натуропатия йўналишида фаолият юритган, тери парвариши учун кремлар сотган, шунингдек, дайвинг билан шуғулланган. Бундан ташқари, Дуйсбург шаҳрида иккита хонадон ҳам сотиб олган.

Ҳолатнинг яна бир ғалати жиҳати бор: 2015 йилда коллеж директори этиб тайинланган раҳбар ушбу ўқитувчини ҳеч қачон кўрмаган. Унинг педагоглар жамоаси таркибида расман ишлаётганидан ҳам бехабар бўлган. Мазкур ҳолат фақат 2024 йилда, таълим муассасаси раҳбарияти яна алмашганидан сўнг аниқланган.

Шундан кейин аёлнинг соғлиғи ҳолатини мустақил баҳолаш учун тиббий кўрикдан ўтиши талаб қилинган. Бироқ у бундан бош тортишга уринган ва ҳатто судга мурожаат қилган. Аммо унинг даъвоси қаноатлантирилмаган.

Ҳозирда ўқитувчи фирибгарлик ва тиббий маълумотномаларни сохталаштиришда гумонланмоқда. Бироқ унинг айби ҳали судда исботлангани йўқ. Bild нашри ёзишича, экспертлар мазкур ҳолатда фирибгарликни исботлаш осон бўлмаслигини таъкидлаган.