Европа давлатларидаги музлаткич ускуналарига уюштирилган киберҳужумлар ортида шу мамлакат фуқаролари турган бўлиши мумкин. Бундай ҳаракатлар Европа Иттифоқидаги ижтимоий муаммоларга эътибор қаратишга қаратилган норозилик шакли бўлиши эҳтимолдан холи эмас. Бу ҳақда Евроосиё тадқиқотлари ва ривожланиши маркази коллегияси раиси, сиёсатшунос Юрий Самонкин маълум қилди.

Унинг фикрича, хакерлар дўконлар, «ақлли уйлар», музлаткичлар ва айрим корхоналарнинг тизимларига кириб, уларни ишдан чиқариш орқали озиқ-овқат хавфсизлигига таҳдид солиши мумкин. Бундай ҳужумлар ортида нафақат хакерлик гуруҳлари, балки сиёсий норозиликни шу йўл билан ифода этаётган шахслар ҳам бўлиши мумкин.

Самонкин Европа давлатларида иқтисодий турғунлик ва беқарорлик кучайган бир шароитда аҳоли ҳукуматлардан ички ижтимоий муаммоларни ҳал этиш бўйича аниқ чоралар кутаётганини таъкидлаган.

Эслатиб ўтамиз, аввалроқ Швеция, Эстония ва Бельгиядаги айрим дўконларда музлаткичларга қилинган киберҳужумлар оқибатида маҳсулотлар яроқсиз ҳолга келгани ҳақида хабар берилган эди.