Туркиянинг шарқида, Арарат тоғи яқинидаги Дюрупинар геологик ҳудудида Нуҳ кемасига тегишли бўлиши мумкинлиги тахмин қилинаётган куйган ёғоч парчалари аниқланди. Тадқиқотчилар уларни тахминан 9 метр чуқурликдан топганини маълум қилди.

Noah’s Ark Scans тадқиқот гуруҳи топилган намуналарни радиоуглерод таҳлили учун лабораторияга юборган. Таҳлиллар ёғочнинг қачонга тегишли эканини аниқлашга ёрдам беради. Дастлабки натижалар яқин ойларда маълум бўлиши, тўлиқ ҳисобот эса 2027 йилда эълон қилиниши кутилмоқда.

Дюрупинар ҳудуди шаклан ағдарилган кемани эслатувчи, узунлиги қарийб 157 метр бўлган тепаликдан иборат. Айрим тадқиқотчилар уни Нуҳ кемасининг қолдиғи деб ҳисоблайди. Бироқ геологларнинг катта қисми бу шакл табиий геологик жараёнлар натижасида пайдо бўлганини таъкидлайди.

Тадқиқот лойиҳаси раҳбари Эндрю Жонснинг ўзи ҳам топилган ёғоч парчалари бир неча аср аввал бу ерда чорва боққан чўпонларнинг гулханидан қолган бўлиши мумкинлигини истисно этмаган.

Ҳозирча топилмаларнинг Нуҳ кемасига алоқадорлигини тасдиқловчи илмий далиллар мавжуд эмас.