Япониянинг Итикава ҳайвонот боғида яшовчи Панч исмли макака ижтимоий ҳаётга мослашиб, бошқа маймунлар билан фаол мулоқот қила бошлади. Илгари ёлғизлиги билан интернетда машҳур бўлган маймун энди тўдасидаги бошқа бола маймунлар билан ўйнамоқда.

Ҳайвонот боғи ходимлари ижтимоий тармоқларда Панчнинг ўзгарган хулқ-атворини акс эттирувчи янги видеоларни эълон қилди. Кадрларда уни бошқа маймун боласи билан ўйнаётгани ва катта маймунлар билан бемалол мулоқот қилаётганини кўриш мумкин.

Авваллари Панчнинг ягона ҳамроҳи орангутан кўринишидаги юмшоқ ўйинчоқ бўлган. Чунки онаси уни туғилганидан кейин парвариш қилишдан бош тортган, маймунлар тўдаси эса дастлаб уни қабул қилмаган. Шу сабабли Панч кўп вақтини ўйинчоғини бағрига босиб ўтказган.

2026 йил февраль ойида унинг ўйинчоғини қучоқлаб ўтирган сурати интернетда кенг тарқалиб, катта муҳокамаларга сабаб бўлган. Ижтимоий тармоқ фойдаланувчилари #HangInTherePunch («Чида, Панч») хештеги остида уни қўллаб-қувватлаш кампаниясини бошлаган.

Энди эса Панчнинг ҳаёти ҳақида болалар китоби ҳам нашр этилиши кутилмоқда. «Таслим бўлма, Панч: маймун боласининг улғайиш тарихи» деб номланган 48 саҳифали китобни 2026 йил ноябрь ойида чоп этиш режалаштирилган.