Япониянинг Токио университети олимлари давомийлиги атиги 300 аттосекунд бўлган ўта кучли рентген импульсларини ҳосил қилиб, жаҳон рекордини ўрнатди. Тажрибада Европадаги эркин электронли рентген лазеридан (XFEL) фойдаланилган.

Тадқиқотчилар рентген нурларини инсон сочи кўндаланг кесимидан тахминан 100 минг марта кичик майдонга жамлашга муваффақ бўлган. Бунинг учун нурларни вертикал ва горизонтал йўналишларда фокуслайдиган иккита махсус кўзгудан иборат оптик тизим қўлланилган. Ҳар бир импульс кўзгулардан тўрт марта акс эттирилган.

Нурлар таъсир кўрсатган майдон ўлчами 180×330 нанометрни ташкил этган. Натижада олимлар ҳар квадрат сантиметрга 10²⁰ ваттдан ортиқ интенсивликка эришган.

Ушбу ютуқ атом ва молекулалар ичидаги электронларнинг ҳаракатини ўрганиш учун янги имкониятлар очиши мумкин.