2027 йилда Ўзбекистон Давлат бюджети харажатларининг катта қисми таълим, соғлиқни сақлаш ва ижтимоий ҳимоя йўналишларига сарфланади. Бу ҳақда 13 ноябрь куни Президент Шавкат Мирзиёев раислигида келгуси йилги Давлат бюджети кўрсаткичларига бағишлаб ўтказилган йиғилишда маълум қилинди.

Тақдимотга кўра, келгуси йили таълим соҳасини молиялаштириш учун 114,3 трлн сўм ажратиш режалаштирилган. Бу жорий йилга нисбатан 14 трлн сўм кўп.

Соғлиқни сақлаш тизимига 61,4 трлн сўм йўналтирилади. Мазкур кўрсаткич ҳам ўтган йилга нисбатан 12 трлн сўмга ошади.

Шунингдек, ҳудудлар ва маҳаллалар инфратузилмасини яхшилаш, аҳоли бандлиги ва даромадларини ошириш, инсон капиталини ривожлантириш ҳамда ижтимоий ҳимояни кучайтириш учун 70 трлн сўм ажратиш кўзда тутилган.

Умуман, ушбу учта йўналиш учун 245,7 трлн сўм маблағ йўналтирилиши режалаштирилмоқда.

Йиғилишда 2027 йилги Давлат бюджети даромадларини 416 трлн сўм, харажатларини эса 464 трлн сўм этиб белгилаш таклиф қилинди. Бюджет лойиҳаси иқтисодий ўсишнинг 7 фоизлик прогнози асосида шакллантирилган.

Келгуси йилда мамлакат ялпи ички маҳсулоти ҳажмини 232 млрд долларга етказиш, инфляцияни 6 фоиздан оширмаслик ва олтинсиз экспорт ҳажмини қарийб 40 млрд долларга чиқариш мақсад қилинган.

Шунингдек, 2027 йилда асосий солиқ ставкаларини ўзгаришсиз сақлаш, умумий фискал тақчилликни ялпи ички маҳсулотга нисбатан 3 фоиз доирасида ушлаб туриш режалаштирилмоқда.

Йиғилишда бюджет маблағларининг самарали сарфланишига алоҳида эътибор қаратилди. Давлат харажатларини мақсадли йўналтириш, самарасиз сарф-харажатларни қисқартириш ва инвестиция лойиҳалари устидан рақамли назорат тизимини жорий этиш бўйича топшириқлар берилди.

Бундан ташқари, келгуси йилда мамлакат иқтисодиётига 65 млрд доллар хорижий инвестиция жалб қилиш бўйича тармоқлар ва ҳудудлар кесимида аниқ режалар ишлаб чиқиш вазифаси қўйилди.

Эслатиб ўтамиз, жорий йил якунида Ўзбекистон иқтисодиёти камида 8 фоизга ўсиши, ялпи ички маҳсулот ҳажми 200 млрд доллардан ошиши кутилмоқда.