Ҳиндистоннинг Мадҳя-Прадеш штатида эркак таниши берган ширинликни емоқчи бўлганида оғзида портлаш юз берди. Оқибатда у оғир жароҳат олиб, шифохонага олиб борилганига қарамай вафот этди.

Ҳодиса эркак кечки овқатдан сўнг олов ёнида ўтирган пайтда содир бўлган. Унинг олдига келган таниши суҳбат давомида унга ширинлик таклиф қилган. Эркак ширинликдан бир тишлаши билан унинг ичидаги портловчи қурилма ишга тушган.

Ҳуқуқни муҳофаза қилувчи органлар маълум қилишича, ширинлик ичига ёввойи чўчқаларни овлашда қўлланадиган портловчи мослама яширилган бўлган. Ҳозирда полиция ушбу восита таниши қўлига қаердан келиб қолганини аниқламоқда.