АҚШ, Хитой ва Россия президентлари Дональд Трамп, Си Цзиньпин ҳамда Владимир Путин келаси ҳафта Хитойнинг Шэньчжэнь шаҳрида бўлиб ўтадиган Осиё-Тинч океани иқтисодий ҳамкорлиги (АТЭС) саммити доирасида учрашиши режалаштирилмоқда. Бу ҳақда Оқ уй ва Кремль маълум қилган.

Агентлик қайд этишича, дунёнинг энг йирик ядровий давлатлари раҳбарларининг уч томонлама учрашуви илк бор ўтказилиши кутилмоқда. Бироқ таҳлилчилар музокаралардан жиддий келишувлар кутиш қийинлигини, учрашув кўпроқ рамзий аҳамиятга эга бўлишини билдирган.

Трамп Си Цзиньпин ва Путин билан учрашувда АҚШнинг Эрон билан урушини ҳамда уч давлатнинг ядровий қурол захиралари бўйича уч томонлама келишувга эришиш масаласини муҳокама қилмоқчи.

Оқ уйнинг юқори мартабали вакилига кўра, Трамп музокараларда Украинадаги уруш масаласини кўтармайди.

Маълум қилинишича, АҚШ ва Россия ўртасидаги стратегик ҳужум қуролларини қисқартириш бўйича СНВ-III шартномасининг амал қилиш муддати февраль ойида тугаган. Бу ярим асрдан ортиқ вақт давомида илк бор икки давлатнинг ядровий арсеналлари устидан чекловлар бекор бўлишига олиб келган.

Трамп Россиянинг шартномани яна бир йилга узайтириш таклифини рад этган ва Хитой ҳам иштирок этадиган янги, такомиллаштирилган ядровий келишув тузиш зарурлигини билдирган.