Испанияга қарашли Канар оролларига бир кунда 1 488 нафар муҳожир олиб келинди. Бу сўнгги олти йилда қайд этилган энг юқори кунлик кўрсаткич бўлди.

MIR 24 хабарига кўра, соҳил қўриқлаш хизмати 14 та қайиқда бўлган муҳожирларга ёрдам кўрсатган. Бундан олдинги рекорд 2020 йил ноябрь ойида қайд этилган бўлиб, ўшанда бир кунда 1 461 киши қутқарилган.

Муҳожирлар орасида 240 нафар йўловчиси бўлган қайиқ ҳам бор. Уларнинг 12 нафари аёллар, 36 нафари эса вояга етмаганлардир. Муҳожирларнинг аксарияти Сенегал, Гамбия ва Гвинея-Бисау фуқароларидан иборат.

Уларнинг кўпчилиги аҳоли ва муҳожирларни жойлаштириш имкониятлари чекланган Эль-Йерро оролига олиб борилган. Яна икки қайиқ Гран-Канария ва Тенерифе оролларига етиб келган.

Маълум қилинишича, йил бошидан буён Канар оролларига келган муҳожирлар сони ўтган йилнинг шу даврига нисбатан 5,5 фоизга камайган. Бироқ октябрь ойидаги кескин ўсиш маҳаллий қабул марказларига жиддий юклама келтириб чиқарган.

Ғарбий Африкадан Атлантика океани орқали ўтувчи миграция йўналиши дунёдаги энг хавфли йўллардан бири ҳисобланади. Муҳожирлар кучли оқимлар ва узоқ масофаларни кичик, одамлар билан тўла қайиқларда босиб ўтишга мажбур бўлади.