Internet tarmog‘ida “Sokin soy” kafesi yaqinida bir nechta kishi va haydovchi o‘rtasida kelishmovchilik videosi tarqaldi. Toshkent shahar IIBB holat bo‘yicha maʼlumot berdi.
Unga ko‘ra, 2021 yil 21 sentyabr kuni Olmazor tumani Toshkent xalqa avtomobil yo‘lida 30 yoshli Farxod I. “Spark” rusumli (davlat raqami 01 138 WHA) avtomobilni boshqarish davomida yo‘l chetida to‘xtagan. So‘ng bir nechta nomaʼlum shaxslar kelib, haydovchi yo‘l harakati qoidabuzarliklarini qayd etib ichki ishlar organlariga jo‘natmoqchi deb o‘ylab u bilan janjal boshlashgan.
Holat Olmazor tumani IIO FMB 1-son ichki ishlar bo‘limida qayd etildi. Hozirda ichki ishlar organlari xodimlari tomonidan nomaʼlum kishilarning shaxslarini aniqlashga qaratilgan tadbirlar olib borilmoqda. Ularning xatti-harakatlariga huquqiy baho berilib, qonuniy chora ko‘riladi.
