Италияда Алишер Усмоновга тегишли 5 тонналик зирҳли автомобил мусодара қилинди. Бу ҳақда “The Times” хабар берди.
Нашрнинг ёзишича, Сардинияда Италия солиқ полицияси томонидан россиялик олигарх Алишер Усмоновга тегишли, пулемёт ва қўл гранаталари ҳужумларига бардош бера оладиган, зирҳли Mercedes Maybach S650 Guard VR10 автомобили мусодара қилинди.
Оғирлиги 5 тонналик Maybach S650 2018 йилда Сардинияда 600 000 эвродан кўпроққа сотиб олинган.
Европа Иттифоқининг Россияга тегишли виллалар ва яхталари бор олигархларига нисбатан қўллаган санкциялари натижасида бир вақтлар Буюк Британиянинг энг бой одами сифатида тилга олинган ўзбекистонлик тоғ-кон магнати Алишер Усмонов яқинда Сардиниядаги 17 миллион евролик вилласидан ва 66 миллион евролик активлари бўлган олти компаниясидан айрилган.
Ўтган йилнинг май ойида “The Times” Алишер Усмоновни сўнгги 20 йилдаги энг саховатли хайриячи деб атаган эди. У 2020 йилда хайрия ишларига 716 миллион доллар, яъни бойлигининг 3,7 фоизини ажратган. У асосан, санъат, спорт ва илм-фан соҳасидаги лойиҳалар ва Covid-19 га қарши кураш ишларини молиялаштирган.
