20 июн куни 2022/2023 ўқув йили учун олий таълим муассасаларининг бакалавриат таълим йўналишларига абитуриентларни онлайн рўйхатга олиш бошланди. ДТМ номзодларга керакли ҳужжатлар рўйхатини эълон қилди.
Абитуриентлар рўйхатдан ўтишлари қуйидаги тартибда амалга оширилади:
Телефон рақамини авторизасиядан ўтказиб, паспорт маълумотлари, доимий яшаш манзили ва тугатган таълим муассасаси бўйича маълумотларни киритишлари, шунингдек, имтиёзлари мавжуд бўлса, уларни текширишлари ҳамда чет тилидан миллий ёки халқаро сертификатга эга бўлса, сертификат маълумотларини киритишлари мумкин.
Таълим йўналишларини эса 2022/2023 ўқув йили учун қабул параметрларининг таълим тиллари бўйича тақсимоти тасдиқланганидан сўнг танланади.
Абитуриентларни рўйхатга олиш Давлат тест марказининг расмий сайти ва Ягона интерактив давлат хизматлари портали орқали онлайн амалга оширилади.
Рўйхатга олиш 20 июлга қадар (20 июл куни ҳам) давом этади ва абитуриентлар 20 июлга қадар ўз маълумотларини ўзгартиришлари ҳамда чет тилидан миллий ёки халқаро сертификатга эга бўладиган бўлса, сертификат маълумотларини киритишлари мумкин бўлади.
Чет тилидан касбий (ижодий) имтиҳон ўтказиладиган бакалавриат таълим йўналишларига онлайн рўйхатга олиш эса 10 июлга қадар (10 июл куни ҳам) амалга оширилади.
