АҚШ Президенти Жо Байден маъмурияти сайёранинг энг бой одами Илон Маскнинг хатти-ҳаракатларида миллий хавфсизликка таҳдид борлигини текшириши керакми ёки йўқлигини муҳокама қила бошлади. Бу ҳақда “Bloomberg” манбаларга таяниб хабар берди.
Агентлик манбаларининг сўзларига кўра, расмийлар, хусусан, Маскдан ташқари бир гуруҳ хорижий инвесторлар иштирок этаётган Twitter ижтимоий тармоғини сотиб олиш бўйича келишувни, шунингдек, тадбиркорнинг “Starlink” сунъий йўлдошининг Украинадаги фаолияти ҳақидаги баёнотларини текшириш ҳақида ўйламоқда.
“Bloomberg” манбаларининг таъкидлашича, АҚШ расмийлари Маскнинг яқинда Starlink сунъий йўлдоши орқали Украина билан алоқаларини узиб қўйиш таҳдиди ва бизнесменнинг “Президент Владимир Путин учун фойдали бўлган тинчлик таклифлари ёзилган бир қатор твитларидан сўнг Россияга дўстона муносабатда бўлаётганидан” хавотирда.Агентлик мунозаралар дастлабки босқичда эканлигини таъкидлади. Америка расмийлари ва разведка идоралари Маскнинг хатти-ҳаракатларини текширишга қарор қилинса, қандай воситалардан фойдаланиш мумкинлигини кўриб чиқмоқда.
Маскнинг битимлари ва операцияларини текширишни АҚШдаги хорижий инвестициялар бўйича қўмитага топшириш варианти кўриб чиқилмоқда.Tesla ва SpaсeX асосчиси Илон Маск сўнгги ҳафталарда Twitter’да Россиянинг Украинага қарши уруши ҳақида бир қанча баёнотлар берди, хусусан, у аннексия қилинган Қрим Россиянинг бир қисми бўлиб қолиши кўзда тутилган тинчлик таклифларини билдирди.Шу билан бирга, SpaсeX сентябрь ойида Пентагонга Украина учун Starlink сунъий йўлдош алоқаларини молиялаштиришни тўхтатмоқчи эканлигини айтгани маълум бўлди.
Маскнинг сўзларига кўра, компания уруш бошланганидан бери бунга 80 миллион доллардан ортиқ маблағ сарфлаган. 15 октябрь куни Маск SpaceX Украинада бепул ишлашда давом этишини маълум қилди.
