Тошкент вилоятидаги Ангрен иссиқлик электр станциясининг энергоблокида носозлик юзага келди, деб хабар бермоқда Энергетика вазирлиги матбуот хизмати.
Қайд этилишича, вазирлик раҳбарияти Ангрен ИЭСда юзага келган носозликни бартараф этиш ишларини жадаллаштириш учун станцияга етиб борган.
Носозликни бартараф этиш бўйича махсус бригада ташкил этилган ва ишларни жадаллаштириш бўйича тегишли топшириқлар берилган. Маълумотларга кўра, 13 ноябрь куни соат 15:14 да Ангрен ИЭСнинг 10-сонли энергоблок қозонидаги қувурлар ёрилиши натижасида мазкур энергоблок режадан ташқари тўхтатилган.
Ҳозирда махсус таъмирлаш бригадаси томонидан қозондаги носозликни бартараф этиш ишлари жадаллик билан олиб борилмоқда. Таъмирлаш ишлари қисқа вақт ичида якунланади ва шаҳарга иссиқлик энергияси етказиб берилиши қайта тикланади.
