Ўзбекистон Марказий банки бошқарувининг 7 октябрдаги қарорига асосан «Туркистон» хусусий акциядорлик тижорат банкидан банк фаолиятини амалга ошириш ҳуқуқини берувчи лицензия чақириб олинган. Шу сабабли банк омонатчиларнинг маблағларини муддатидан аввал қайтаради.
Қайд этилишича, фуқароларнинг банклардаги омонатларини кафолатлаш фонди Кузатув кенгашининг 2022 йил 18 ноябрдаги қарорига асосан «Туркистонбанк» омонатчиларининг маблағларини муддатидан аввал қайтирилиши белгиланган. 21 ноябрдан бошлаб «Туркистонбанк» омонатчилари бўлган жисмоний шахслар омонатга жойлаштирган маблағлари юзасидан агент-банк сифатида танланган «Қишлоқ қурилиш банк»ка мурожаат этишлари мумкин.
Таъкидланишича, омонатчилар қайтариб олинаётган пул маблағларини ўзлари хоҳлаган тарзда – нақд пул шаклида олиши, банк картасига кўчириши ёки агент-банк бўлган «Қишлоқ қурилиш банк»ка омонатга қўйиши мумкин.
«Фуқароларнинг омонатлари бўйича ҳақ тегишли ҳужжатларнинг асл нусхалари (паспорт, омонат дафтарчаси, омонат шартномаси, нотариус томонидан тасдиқлаган ишончнома) кўрсатилган тақдирда омонатчиларнинг қонуний вакилларига ёки уларнинг ҳуқуқий ворисларига ҳам тўлаб берилади», — дейилади хабарда.
