Россиялик пранкерлар Полшанинг Украина билан чегарага яқин жойда ракета қулаган кечаси Макрон номидан Полша президентига қўнғироқ қилган.
Владимир Кузнетсов ва Алексей Столяров исмли пранкерлар Полшанинг Пшеводув қишлоғига ракета қулашидан сўнг, дарҳол Анжей Дудага қўнғироқ қилгани ва ўзини Франция президенти Эммануел Макрон деб таништирганликларини хабар қилишди.
Полша президенти идораси ҳам бу маълумотни тасдиқлади.
Суҳбат етти ярим дақиқа давом этган. Пранкнинг нашр этилган ёзувида, хусусан, Дуда жуда эҳтиёткор эканлигини ва содир бўлган воқеа учун Россияни айбламаслигини маълум қилган.
Полша президенти идораси суҳбат чоғида Анжей Дуда қўнғироқ қилувчининг ғайриоддий хатти-ҳаракатидан уни алдашга уринаётган бўлиши мумкинлигини англагани ва суҳбатни якунлаганини қайд этди. Полша Президенти девони ҳолат юзасидан бошқа хизматлар билан ҳамкорликда текширув бошлаган.
Маълумотларга кўра, бу сўнгги йилларда иккинчи марта россиялик пранкерларнинг Анжей Дудага қўнғироқ қилиши. 2020-йилда улар БМТ Бош котиби Антониу Гутерриш номидан Полша президентига қўнғироқ қилган. Бундан ташқари, ушбу пранкерлар Эммануел Макрон, британиялик қўшиқчи Элтон Жон ва Буюк Британиянинг собиқ бош вазири Борис Жонсон ва бошқаларга ҳам турли қўнғироқлар билан чиқишган.
Ҳозирда Пранкерларнинг Россия Федерал хавфсизлик хизматида ишлаши гумон қилинмоқда, аммо улар буни рад этишмоқда.
