Россиянинг “Бюллетен кинопрокатчика” журнали бош муҳаррири Александр Нечаев 36 ёшида вафот этди. Бу ҳақда журнал Telegram канали хабар берди.
Журналистнинг ҳамкасби ва дўсти Денис Корсаковнинг айтишича, Нечаев Тошкент шаҳридаги квартиралардан бирида ўлик ҳолда топилган. У журналист билан охирги марта 4 март куни боғланган.
Денис Корсаковнинг айтишича, Нечаев бир неча ой яшаш учун Тошкентга кетган ва апрель ойида Москвага қайтишни режалаштирган. 6 март куни Нечаев алоқага чиқишнинг иложи бўлмаган, унинг дўстлари тошкентлик танишларидан ҳаммаси жойида ёки йўқлигини текширишни сўраган.
Улар уй эгаси ва ички ишлар ходимлари билан биргаликда ижарага олинган хонадонга келган. Шу пайтда Александр Нечаев ўлик ҳолда топилган. У нима сабабдан вафот этгани ҳозирча аниқ эмас.
Бош прокуратура матбуот котиби Ҳаёт Шамсутдинов ушбу ҳолат юзасидан текширув ишлари бошланганини маълум қилди.
«36 ёшли журналист Александр Нечаев вафот этганлиги ҳолати юзасидан Мирзо-Улугбек тумани прокуратураси томонидан терговга қадар текширув харакатлари ўтказилмокда.
Ўлим сабабини аниклаш учун суд-тиббий экспертизаси тайинланган.
Натижалари ҳақида қўшимча хабар қилинади, дейилади хабарда.
