Сенат Ўзбекистонда электр, газ ва сувни талон-торож қилиш ўғрилик жинояти деб баҳоланишини маъқуллагани тўғрисида хабар берилганди. Адлия вазирлигининг маълум қилишича, бу борадаги қонун билан Маъмурий жавобгарлик тўғрисидаги кодекс ҳамда Жиноят кодексига ўзгартиш ва қўшимчалар киритилган.
Жумладан, Жиноят кодексига киритилган қўшимчага кўра:
умумий фойдаланишдаги электр, иссиқлик, газ ёки водопровод тармоқларига тижорат мақсадларида ўзбошимчалик билан уланиш ёхуд электр энергиясини, табиий газни, совуқ ёки иссиқ сувни ҳисобга олиш асбобларига, шу жумладан, уларнинг пломбаларига қасддан шикаст етказиш ёхуд ҳисобга олиш асбобларининг кўрсаткичларини ўзгартириш мақсадида уларга ташқаридан аралашиш йўли билан талон-торож қилиш ўғрилик деб белгиланди ҳамда мазкур ҳуқуқбузарлик учун 5 йилгача озодликдан маҳрум қилиш жазоси қўлланилиши мумкин.
Шунингдек, Маъмурий жавобгарлик тўғрисидаги кодексга киритилган қўшимчага кўра, ушбу ҳуқуқбузарликни оз миқдорда содир этган шахсларга қуйидаги маъмурий жазо чоралари қўлланилиши мумкин:
БҲМнинг 10 бараваридан 20 бараваригача (3 миллион сўмдан 6 миллион сўмгача) миқдорда жарима;
ёки 15 суткагача муддатга маъмурий қамоққа олиш.
