АҚШнинг Флорида штати сенатига 16 ёшгача бўлганларга ижтимоий тармоқлардан фойдаланишни мутлақо тақиқлаш кўзда тутилган қонун лойиҳаси киритилди.
Тақиқлов нималардан иборат?
- Флорида штати ҳудудида болалар ва ўсмирларнинг ижтимоий тармоқлар (айниқса, TikTok ва Meta)да рўйхатдан ўтиши ман қилинади;
- Ижтимоий тармоқларга вояга етмаганларнинг аккаунтларини тиклаш имкониятисиз ўчириб юбориш мажбурияти юклатилади (ота-оналарнинг рухсати инобатга олинмайди).
Ўрнатилган тартиб бузилганда ижтимоий тармоқлар даъвогарларга $10 минг маънавий зарар, қолаверса, суд харажатлари ва адвокатнинг хизмат ҳақини тўлаши мумкин.
Юқоридаги ташаббус Флорида штати губернатори Рон ДеСантисдан чиққан. Янги қонун штат Вакиллар палатаси (депутатлар) томонидан 106:13 нисбатда маъқулланди. Қонун кучга кириши учун Флорида Сенати овоз бериши керак, ҳозирча санаси номаълум.
