Тошкент вилояти ҳокими матбуот котиби Беҳзод Қобулов депутат Жаҳонгир Тўлаганов ҳақидаги гапларга ўз муносабатини билдирди. Бу ҳақда ўзининг Facebook саҳифасида ёзиб қолдирган.
«Депутат Жаҳонгир Тўлаганов ҳақидаги постларни ўқиб, айниқса, ўзидан хавотирга тушиб қолган бақироқларнинг шовқинидан беҳузур бўлдим. Очиқлик сиёсати даврида кўпикка ўхшаб юзага чиқиб қолган, на журналист, на юрист, на сиёсатшунос бўлган кимсаларга ачинасан киши. Қанча томоқ йиртиб бақирсам, шунча кўпроқ одамлар мени қўллаб-қўлтиқлайди, деган утопия таъсиридан тезроқ қутилиш керак. Очиғи, истиҳола даври ўтди, давлат бундай кимсаларга эсини йиғиб олиши учун етарлича вақт берди, Адлия вазирлиги ҳуқуқий жабҳада тинимсиз тарғибот қилди. Энди қонун, ўзингиз талаб қилган ҳуқуқий инструмент ишга тушганда чидаш керак мард бўлиб. Бу биринчидан.
Иккинчидан, Жаҳонгир Тўлаганов билан танишмиз, салом-алигимиз бор эди бир вақтлар. Лекин, ўзининг шахсий муаммолари сабаб вужудга келган ҳолатда дуч келган раҳбарни айбдор қилиб жонли эфирларни гуллатиши ўзини сиёсатчи ҳисоблаган ақлли одамларнинг иши эмас. Яқинда Қобил ака Дўсов билан биргаликда Жаҳонгирга шу мавзуда гапирган эдик. Жаҳонгир Қобил акани маслаҳатини олмади. Қайтага учинчи шахслар орқали чиқишлар уюштириб келмоқда.
Учинчидан, депутатлик мандатини бошга каска қилиб кийиб олиб, исталган кунжакда ишкал чиқаравериш ҳам тўғри иш эмас. Бошига пашша қўнганига сиёсий тус берадиган депутатлар маъмурий ислоҳотларнинг ҳозирги босқичига доир фикр юритиш лаёқатига эга эмас, деб ҳисоблайман, дея ёзиб қолдирган Беҳзод Қобулов.
